جنت جو خيال به عجيب آهي.
بکَ دنيا ۾، طعام جنت ۾
ڏکُ دنيا ۾، سُک جنت ۾
سِڪَ دنيا ۾، ميلاپ جنت ۾
غم دنيا ۾، خوشي جنت ۾
ڪم دنيا ۾، اُجورو جنت ۾،
هر طرف اها دعوٰي آهي ته
اسين آزمائيش ۾ آهيون
(لڳي ٿو ڪنهنجي فرمائيش تي آهيون)
چون ٿا ته دنيا دوکو آهي، ڪوڙ آهي، آزمائيش آهي.
پڇان ٿو ته
اهو دوکو ڏنو ڪنهن؟
اهو ڪوڙ ڳالهايو ڪنهن؟
اها آزمائيش ڇاجي؟ ۽ آزمئيش ۾ وڌو ڪنهن؟
اسان سان اهو کيل ڇو آهي؟
جيئڻ هي ويلُ ڇو آهي؟
او پاڻ کي خدا جا نائيب سمجهندڙ مُلا،
اسان کي ڇڏي ڏيو،
نه کپي جاءِ جنت ۾
نه ڏيو دوزخ جا دڙڪا،
تو بن نٿو لڳي ڪو شيطان
رهڻ ڏيو اسان کي انسان
ڇڏيو ڪاروبار ڪوڙو
وٺو محنت سان اجُورو
ان خوابي دوزخ ۽ جنت کان مٿي
پري
حقيقي
سورُ ڏيندڙ
پيار ڏيندڙ
اُسَ ڏيندڙ
ڇانوَ ڏيندڙ
مهنجهي دنيا آهي
حقيقي دوزخ
۽
حقيقي جنت
(جيم)
